MASKOTEN ARTEKO SOLASALDIA

Bola, Pinpi, Antxu, Satortxo, Xagua eta Hontza berbetan aurkitu ditugu. Begira, begira:

H - Oporrak!!!

S - Ai ene, hau isiltasuna!

P - Bai, baina nahiago dut isiltasuna. Ahaztu al duzu iada pasadan astean izan dugun zarata, ala?

H - Egia. Andereñoak aurrera ta atzera ibili ziren material guztia batzen: gelak eta biltegia hustu zituzten!

A  - ...eta gizon hoiek gure mahai eta aulkiak eraman zituzten baita ere. Eta, bapatean, hormak botatzen hasi ziren...

B  - Zelako pena ematen didan entreplanta txikituta ikusteak, hainbat gauza bizi izan ditugu pareta hauen artean, ains!!!

P  - Benetan pena ematen du, bai. Baina leku politago batera joango gara.

A - Bagoaz? Nora?

P - Eraikin berrira, Antxu! Ez al zenekien?

A - Eeeez! Non dago eraikin berria ba?

X - Antxu, mendian galduta ibiltzen zarela dirudi... Klase berriak txikitsuen haurtzandegiaren gaineko plantan egiten ari dira. Ez al zara konturatu patioan obretako kontenedoreak daudela eta langileak aurrera eta atzera dabiltzala?

A - Ahhh, bai. Patio gorrian dagoen atetik aurrera eta atzera ikusten ditut egunero gizon eta emakume batzuk...

X -  Ba ate horretatik etorriko zaizkigu ikasleak hurrengo kurtsoan gu bisitatzera.

B - Laguntxo berdinak etorriko al dira gure geletara?

S - Ez, Bola, ez. Gurekin egon direnak Antxu eta Pinpirekin joango dira.

A - Eta gurekin egondakoak Hontza eta Xaguren gelara doaz.

H - Eta gure "unibertsitarioak" Lehen Hezkuntzara doaz abentura berriak bizitzera!

B - Eta gu biak laguntxo barik geratuko al gara, Satortxo?

S - Ez, Bola. 2 urteko geletako ikasleak datoz gurekin jolastera. Matirekin egon nintzen lehengo egunean berba egiten eta oso neska-mutiko jatorrak direla esan dit.

X - Hala eta guztiz ere uda luzea egingo zait... umeak faltan botako ditut!!!

H - Bai. Baina sorpresatxo bat daukat zuentzako lagunak!!!

S/B/A/P/X - ZEEEEEEERRRR????

H - Gogoratzen dituzue lagunen etxean pasatako asteburuak?

S - Bai ondo pasa genuela batetik bestera, mundua ezagutzen.

P - Hainbat erretrato egin zizkiguten...

A - eta baita andereñoarena ere! 

X - Gu museotara joan ginen,  motorrez ibili ginen....

A - Ez nituzke momentu horiek ahaztu nahi.

H - Lasai lagunak. Umeekin egindako liburuak hemen uzten dizkizuet behin eta berriro ikusi ahal izateko:

IKASTURTEA JOAN DA TA...

Beno ba, ikasturtea bukatu da iada. 

Badirudi atzo izan zela oporren ostearekin, baina ilusioz beterik, eskolara sartu ginen egun hura. Atzo izan zela dirudi, bai, baina tartean 175 klase egun igaro dira. 175 egun hauetan denetarik bizi izan dugu, haserreak, poztasuna, sorpresa, urduritasuna, lagun berriak egin ditugu, beste lagun zaharrei agur esan diegu, plastilinaz zikin zikin izan ditugu azazkalak kurtso osoan zehar, batzuek koloreak ikasi dituzte (ai ene, dena da "blue" orain 3 urteko geletan), besteek bokalak edota abezedario guztia ikasi dute, fruta piloa jan dugu (nahiz eta beti gustokoa ez izan, apur bat probatu dugu), eskulan ederrak egin ditugu, eta baita txapuzeria asko ere, abestiak kantatu eta dantzatu ditugu...

Gaur umeak, eta familiak, agurtu ditugu irabazitako oporrak baitatoz (zeinen nekaturik dauden gure txikitsuak!). Pilak kargeta elkar ikusiko dugu irailaren 7an bueltan gatozenean. Talde bat, halabeharrez, iada handia egin zaigu eta Lehen Hezkuntzara joango da datorren urtean. Irakasleok gurasoon laguntzarekin, edo agian aldrebes, gure hazitxoa landatu dugu, eta testigua pasatzeko ordua heldu zaigu. Plazer bat izan da zuekin bidai hau egitea!

** Eskerrik asko, bihotzez!

GOROZIKAKO ARGAZKIAK IKUSGAI -- Editatua

Gorozikan bizi izandakoa duzue ikusgai:

1. Eskolako webgunean: ALBISTEAK edota ARGAZKIAK.
2. Haur Hezkuntzako bloga: ARGAZKIAK ATALEAN .

GOROZIKA!!!

Ai ene! Bai urduri egon direla egun hauetan, hilabete osoan ez esatearren, gure txikitsuak. Jakin badakit bat baino gehiago gaur goizean goizetik gurasoen ohera hurbildu dena arin-arin prestatu eta autobusera ahalik azkarren joateko asmoz.

Baina eguna iritzi da iada!!! Saioak eman ditugu Gorozikakoa zein "Sardina bat" motatako abestiak lantzen autobus bidaia arinago pasatzeko, zorabiorik gabe alegia.

Talde majoa elkartu gara aterpetxeko frontoian. Begiraleak ezagutu ditugu, batzuk aurreko urteetatik gogoratzen ditugu. Txakurrak, katuak, oiloak,... zein taldetan dagokit?

Kosta zaigu ondo hastea, baina martxan gaude!!! Egun luzea daukagu aurretik. Bizipen ederrak izatea espero dugu.

Badakizue, buelta 16:30ak aldera izango da (trafikoaren araberakoa alegia).

Hurrengo egunetan zehar argazkiak publikatuko ditugu (gureak eta begiraleenak biltzen ditugunean).

Asteburu ederra izan!

BATZAR DEIALDIA

Datorren astean taldeko batzarrak izango ditugu.

Guztiak Lehenen Hezkuntzako pisuan kokatutako informatika gelan izango dira arratsaldeko 4etan, umeak entregatu eta gero.

1. Astelehenean, 16an, 5 urteko gelak.
2. Asteartean, 17an, 4 urteko gelak.
3. Asteazkenean, 18an, 3 urteko gelak. 

LIBURUAREN EGUNA

Aurreko astean liburuaren eguna ospatzeko 4 eta 5 urteko umeekin liburutegira joan ginen.

Bertan era askotako ipuinak ikusi, ikutu eta entzuteko aukera izan genuen.

Hura gozamena!

Begira zelan disfrutatu genuen...

DINOSAURIOAK

Hilabete honetan zehar 5 urteko geletan hurrengo gaia landu dugu: Dinosaurioak. Zenbat disfrutatu dugun!

Zehatz-mehatz horrela  gertatzen ez dela jakin arren... dinosaurio arrautza urez beteriko palanganan sartu genuen. Egun pare bat pasa zenean arrautza kraskatzen hasi zen: "horia da!", "hankatxoa ikusten zaio!" Jaioberria ikusteko irrikitan geunden denak.

Jaio ondoren izena jarri genion. Horretarako bozkaketa egin genuen: umeek hainbat izen proposatu zituzten eta hamar bat genituenean bakoitzak gustokoenari eman zion botoa. Ia-ia Joxerrak irabazten du!

ARLO ETA HANKATXO

Belarjaleak eta haragijaleak zeudela ikasi dugu, dinosaurio hitzaren esanahia musker erraldoia dela (barre algarak sortu ziren puntu honetan puzker handiak zirelakoan, ainssss, umeak), batzuk taldean eta beste batzuk bakarka ehizatzen zutela...

Eta euren desagerpenari buruzko hainbat teoriei buruz berba egin dugu. Baita praktikara eraman ere!!! Sumendia eraiki dugu gela barruan, eta gaur, arratsalde ezin hobea egiten duela aprobetxatuz patiora irten gara gure sumendia esna arazteko...

Argi ez daukatena da gizakiok eta dinosaurioak elkarrekin ezin izan ginela bizi zeren "andereño, batan bat dinosaurioekin bizi izan zen, euren argazkia atera baitzuen!"  entzun dugu gelan.

Ume zein gurasoen inplikazioa gai honetan txalogarria izan da. Eskerrik asko.

Dinosaurioei buruzko hainbat gauzatxo ikasteko dago oraindik, baina beste kurtso batzuetan izan beharko da. Orain globoan munduan zehar ibiliko baikara.

Ahhh, eta ahaztu baino lehen. Patxo bat amatxo guztiei, domekan zuen egun da eta. Asteburu ederra izan!

ARGAZKIAK

ZINEMA EUSKARAZ: PROP ETA BERTA

Beste urte betez gure ikasleekin Torrebillelara joan egin gara euskarazko film bat ikustera.

Astelehenean A taldekoak joan egin dira eta asteartean B taldekoak.

Betiko moduan umeak oso formal ibili dira zinemarako bidean, bakoitza bere bikoteaz arduratuz inor gal ez dadin.

Aurtengo filmeko protagonistak plastilinaz egindako gizon bat eta bere behi hiztuna dira, "Prop eta Berta".

Orokorrean oso gustura ikusi dute filma ikasleek.

Esperientzi hau sendotu eta zuekin elkarbanatzeko asmoz umeek txosten bat eramango dute etxera, elkarrekin gozatu dezazuela espero dugu. Badaezpada ondorengo estekan sinopsia irakur dezakezue: SINOPSIA.

UHAZAK LANDATZEN

Eguzki amandrea,

zer dakarzu berri?

Negua joan da

eta orain udaberri!

Astelehenean Haur Hezkuntzako ikasleekin batera patiora joan egin gara uhazak landatzera! Printzipioz 5 urteko geletako ikasleentzako programatutako ekintza izan da hau, baina 3 eta 4 urteko ikasleek ikusteko gogoa izan dutenez danak elkarrekin jaitsi gara, eta haietako batzuk aktiboki parte hartu egin dute baita ere!

Gaur ureztazen joan egin gara. Ondo zaiduko ditugu handi-handi egiten direnean jantokian jan ahal izateko. Bai goxo egon behar direla!

Hemen ARGAZKIAK ikusgai dituzue.

PAZKOA PRESTATZEN

3 eta 4 urteko geletako ikasleak pazkoaren inguruko bi lantxo prestatu dituzte azken aste hauetan.

4 urteko gelan imprenta lanetan ibili dira. Patata batean formak moztu eta zigilu moduan erabili ondoren hainbat koloretako arrautza politak estanpatu dituzte orri batean.

3 urteko geletan teknika eta material ugariak erabiliz Pazko Untxiak egin dituzte. Errodiloekin untxia margoztu (baten batek margoa probatu du... lasai umeentzako egokia da eta!), purpurina bota, haginak, muturra eta hortzak itsatsi eta biboteen puntuak egin dituzte gure artistak. Oso ondo pasa dute ekintza hau egiten, eta zer arro eraman dituzte beraiek egindako untxitxoak etxera.

Hemen dituzue prozesuaren argazkiak.

Pilak kargatu oporraldi honetan. Bueltan elkar ikusiko dugu!

ARKITEKTO BIKAINAK

Esan genizuen ba hurrengo batean arkitekto lanetan ibiliko ginela... esan eta egin! Eskolara umeak ekartzen eta batzen zatoztenak iadanik ikusita eukiko duzue: iglua bukatu dugu! Kosta izan zaigu, baina zuek ekarritako tetrabikekin iglu erraldoia eraiki dugu HH5. mailako ikasleekin batera.

3 urteko geletako umeei asko gustatu zaie gure etxe berezian jolastea. Bai goxo eta bero daudela barruan! Apurtzen ez den bitartean jolasteko txoko berria izango da berau. Begira, begira zertan harrapatu ditugun gaur gure neska mutilak, ains!!! (Berandu heldu naiz ze iada jolasean kanporatu bat egon da).



Hemen ARGAZKIAK ikusgai dituzue.

Igluaren atea eta putzua.

Izotzean egidako zuloa arrantzan egiteko.

HILABETE BERRIA, JOLAS BERRIAK!

Beste hilabete batez patioan lantzen ditugun jolasen berri ematera gatoz.

• 3 URTE: SOKA SALTOKA. Banan-banan, lehenengo, eta taldean, gero, sugea saltatzen ibili dira gure ikaslerik txikitsuenak. Bai gustura gero!

• 4 URTE: TRAINERUA. Haurrak errenkadan ipinita pilota atzekoari pasatu behar izan diote. Lehenengoak besoak luzatu beharko ditu buru gainetik pilota atzekoari pasatzeko asmoz eta hau, pilota hartu ondoren, makurtu egingo da hanken azpitik atzekoari emateko. Goitik eta betik, txandakatuz, pilotak ume-tren guztia pasako du. Azken haurrak pilota hartzen duenean filatik irten eta lehenengo umearen aurrean kokatuko da jolasa berriro hasiz.

• 5 URTE: DON MAKARRON. Egia esan esku jolas honen kantak euskera gutxi dauka, beno... hobeto esan bapez, baina jolas polita dela iruditzen zaigu. Ahozko tradizioko jolasa denez letrak aldaketak jasaten ditu leku batetik bestera, eta baita gela batetik bestera ere!

3 URTE - SOKA SALTOKA 

4 URTE - TRAINERUA

5 URTE - DON MAKARRON

• Eta soka dagoela aprobetxatuz Haur Hezkuntzako beste ikasleekin batera soka tiran eta soka saltoka jardun gara, INPROBISATUZ.

ARGAZKI GEHIAGO

Gabonetako jai, Agate Deuna eta ihauterietako ARGAZKI berriak ditugu.

Eskerrik asko Roberto.

ARGAZKIAK ETA BIDEOAK IKUSGAI

Eskolako webgunean dituzue ikusgai Agate Deuna (SANTA AGEDA HH 2016) eta Inauterien argazkiak (INAUTERIAK LH 2016) eta bideoak (INAUTERIAK 2016 HH - LH 1go eta 2 zikloa).

INAUTERIAK 2016

"Hemen ditugu inauteriak

ez al da garai polita,

aurkitzen gara umore onez

ta irribarrez josita.

Alda gaitezke denok itxuraz

arropa zaharrak utzita,

eta inork ez ezagutzeko

denok mozorroz jantzita."

Ba bai, hemen ditugu inauteriak! Txoratzeko moduko aste hau pasa dugu iada. Umeak urduri egon dira, entseguz entsegu ibili gara, Santa Ageda, karnabalak...

Aurpegiak margoztu ditugu baita ere. Begira ze guapo:

• 3 urte.
• 4 urte. Jai galanta ospatu genuen asteazken arratsaldean.
• 5 urte.

Eta, azkenean, lan guztiaren emaitza ikusteko aukera izan duzue. Gozatu al duzue?

Eskerrik asko etortzeagatik. Asteburu luze hau ondo igaro dezazuela espero dugu.

 

GORA KARNABALAK!

* Eskerrik asko DBH 3. mailako ikasleei eta Eneritzi egin dizkiguten etxe politengatik. 

** Egun hauetan zehar argazkiak igoko ditugu, bai hona, baita eskolako web orrialdera ere. Adi bili!

ARGAZKIAK

AGATE DEUNA

  Urtero bezala, aurten ere, Haur Hezkuntzako ikasleak Agate Deunaren bezperan eskolako patiora urten dira abesti zahar hau zuentzat kantatzera:

  Eta gero txokolatea dastatzeko aukera izan dugu jantokian. Bai goxoa!!!

Eta hona hemen amatxu batek bidali digun bideoa (milesker!):

IPAR POLOAN. 5 URTEKO GELA

Jakinaren gainean egongo zaretenez hiruhilabete honetariko lehenengo gaia Ipar Poloa da. Zer nolako biztanleria duen, bertako fauna eta klima ezagutzen ari gara.

Egun batean lanean geundela izozmendiak agertu ziren aldizkari batean eta haurrek ez zutenez oso ondo ulertu izozmendi, edota izebergaren, kontzeptua ondorengo esperimentua aurrera eramatea erabaki genuen.

FLOTAGARRITASUNA LANTZEN.

1. Esne kutxa bat urez bete, kolorante apur bat bota eta izozkailuan sartu egun pare batez.
2. Ontzi garden bat urez bete.
3. Tetrabrika zabaldu...
   Ura al dago? Bai? Ez? Likidoa edota solidoa? 
4. eta uretara bota.
   -"Zer gertatuko zaio? Ondoratuko da edota flotatzen geratuko da?"
   -"Ba, horixe andereino, kokakolan moduan flotatuko du!"
5. Eta kortxo bat botatzen badugu?
6. Eta plastilina pilota bat?
7. Eta plastilina pilota honi katilu forma ematen badiogu?
8. Eta orain izozmendia urperatzen ahalegintzen bagara?
   -"Andereino, nik lortu dut"
   -"Bai, baina, orain eskua kendu gainetik eta ikusi zer gertatzen zaion!"
   -"Ui, ene, barriro gira dator!"
9. Astelehenerarte izozmendia beste ontzi batean utziko dugu... eta bueltan ikusiko dugu aldatu egin den.

Benetan dibertigarria izan dela ariketa hau.

Hurrengo batean arkitekto lanetan ibiliko gara, ikusiko duzue!

ARGAZKIAK HEMEN.

EUSKARAZ JOLASTEN

Joxe Martin
"...nirekin ezkonduz gero"

Kurtso berriagaz batera euskara eta euskal ohiturak sustatzeko "Euskal musika" eta "Euskal jolasak patioan" iharduerekin jarraitu dugu.

Iaz gertatzen zen era berean ikasleak ostirala irizteko irrikitan daude patio orduan musika ipiniko baitugu. Zenbat gustatzen zaien dantzan aritzea!

Eta ildo beretik euskal jolasak (edota jolasak euskeraz) lantzen ibili gara: korro txirinboloa, Trikitixa, karretila, Joxe Martin, zapiaren jolasa, e.a. Jolasa gelan landu ondoren ikasleak gainontzeko taldeei erakusteko irrikitan egoten dira.

Karretila

Korro Txirinbolo

Hemen dituzue zenbait argazki ikusgai:

• 3 urte
• 4 urte
• 5 urte

WEB ORRIALDE BARRIA

Bentades Ikastetxeak web orrialde barria estreinatzen du gaur, erakargarriagoa, dinamikoagoa, intuitiboagoa eta zuen partehartzea erraztuko duena. Berau ikustera animatzen zaituztegu.

Bide batez, multimedia gunean gabonetako jaialdian ateratako argazkiak ikusgai dituzuela jakinarazten dizuegu.

Gogoratu helbidea:

http://www.bentadesikastetxea.com/

PUXIKEKIN JOLASEAN 5 URTEKO GELAN

"Zer da airea? Nondik dator? Nora sartzen dugu arnasa hartzean? Janaria leku berdinera al doa?" Hauek izan dira buruan bueltaka izan ditugun galderak.

Oporretatik bueltan puxikekin jolasean ibili gara. Lehenengo hipotesiak egin ditugu: "Nora joango da puztutako puxika bat batean askatuz gero? Buelta asko emango dituela badakigu, baina zein izango da hasierako norantza?" Danatarik entzun dugun arren ia haur gehienek asmatu egin dute: zuloa ez duen alderantza! Zelako ikasle azkarrak ditugun!

Eta behin teoria landu eta gero, bakoitza bere puxikarekin jolasean ibili da puztu eta askatuz behin eta berriro. Egia esan baten bati puxika puztea kosta egin zaio, ai ene!

Bukatzeko, hurrengo egun batean, puxika lasterketak egin ditugu, A taldea B taldearen kontra. Primeran pasa dute, batzuk triste samar geratu diren arren euren kohetea geldi geratzen dela ikustean... baina beno, beti ez dugu irabazi egingo ezta? Azken emaitza??? Barrea eta umore ona garaileak izan dira.

Asteburu ederra pasa!!!